ಭಾರತದಲ್ಲಿ ಬಹುತೇಕ ಜನ ಮೂಲತಃ ಹಳ್ಳಿಯವರೇ! ಹಳ್ಳಿಗೆ ತನ್ನದೇ ಆದ ಜಗತ್ತೊಂದು ಇದ್ದೇ ಇದೆ. ಅಲ್ಲಿನ ಅನುಭವಗಳೇ ವಿಶಿಷ್ಟ. ಸ್ವಾತಂತ್ರ್ಯಪೂರ್ವ ಕಾಲದಲ್ಲಿ ಹುಟ್ಟಿದ ಹಳ್ಳಿ ಹೈದರ ಅನುಭವ ಲೋಕ ಕೂಡಾ ವಿಶಿಷ್ಟವಾದುದೇ; ಅಂಥ ಅನೇಕಾನೇಕ ಹಳ್ಳಿ ಹೈದರಲ್ಲಿ ನಾನೂ ಒಬ್ಬ.
ಇಲ್ಲಿನ ಪದ್ಯಗಳು ಹಳ್ಳಿ ಅನುಭವವನ್ನೇ ನಮ್ಮೂರ ನುಡಿಗಟ್ಟಿನಲ್ಲಿ ಕಟ್ಟಿ ಕೊಡುತ್ತವೆ. ಒಂದು ಹಳ್ಳಿಯ ಸಾಂಸ್ಕೃತಿಕ ಅನಾವರಣಕ್ಕೆ ಇಂಥ ಪದ್ಯಗಳೂ ಸಹ ಕಿಟಕಿ, ಬಾಗಿಲು, ಗವಾಕ್ಷಿಗಳೇ ಎಂಬುದು ನನ್ನ ನಂಬಿಕೆ !
ಹೀಗಾಗಿ ಇಲ್ಲೊಂದು ಹಳ್ಳಿಯ ಎಲ್ಲೆ ಕಟ್ಟಿದೆ. ದೇಸಿ ನುಡಿ-ಪಟ್ಟೂ ಇದೆ. ಅವರೆಕಾಯಿ ಸೊಗಡಿನ ವಿಶಿಷ್ಟ ಪರಿಮಳವೂ ಇರಲಿಕ್ಕೆ ಸಾಕು.
ನನ್ನ ಬಾಲ್ಯದ ಬೆಳ್ಳಿಯ ದಿನಗಳ, ಬಂಗಾರದ ಕ್ಷಣಗಳ, ಮಣ್ಣಿನ ವಾಸನೆಯೇ ಇಲ್ಲಿ ನುಡಿ ನುಡಿಯಲ್ಲಿ ಪಲ್ಲವಿಸಿದೆ. ಪ್ರಿಯ ಓದುಗರೇ, ಇದು ನಿಮಗಿಷ್ಟವಾಗಬಹುದು. ಓದಿ ನೋಡಿ.
_ ದೊ.ರಂ.ಗೌ